SOPOTI 0-1 LAÇI

SOPOTI: Guma, Aghma(Lezi
63’), Ahmetaj, Bahiti,A.
Hoxha, D.Hoxha(K.Karaj
73’), Malluta(Shkupi 71’),
Hajdari, Plepi, Moqi, Beqiri.
Trajner: Besnik Kola
LAÇI: Nasufi, Sekseri,
Sefgjini, Kastrati, Lini,
Mustafaraj(Kola 72’),
Nimani(Xhetani 58’), Tanushi,
Ivanaj, Balla,Xhagalliu.
Trajner: Ilir Gjyla
GOLAT: Ivanaj 7’
GJYQTARË:T.Latifi, R.Zhuli,
I.Tartari(Gjirokastër)
KARTONË TË VERDHË:
Bahiti, Hoxha/ Sekseri,
Xhetani, Lini
KARTONË TË KUQ: Xhetani


Sopoti e nisi me humbje kampionatin dhe kjo është më e rëndë, pasi librazhdasit lanë tri pikë shumë të vlefshme para sportdashësve të tyre. Gjithsesi, drejtuesit e ekipit vendës dolën të pakënaqur jo vetëm nga rezultati i takimit, por mbi të gjitha nga niveli i gjykimit për të cilën ata pretendojnë se, nuk u ngjit në nivelin e duhur. Po këta drejtues e kishin vlerësuar si duhet kampionatin dhe kishin marrë masa për një fillim sa më të mirë të tij. Futbollistët vendës e filluan mirë lojën dhe nëpërmjet veprimeve sulmuese kërkonin të shënonin.Që në minutën e 3-të ka qenë futbollisti i mirënjohur vendës, Hajdari, i cili me një goditje nga larg kërkoi të befasonte portierin mik. Ky rast u ka diktuar miqve nga Laçi të jenë më vigjilentë dhe menjëherë të kundërpërgjigjen me anën të Linit. Do të vinte minuta e 7-të, kur pas një krosi të miqve, portieri Guma nuk e zotëron topin dhe Ivanaj i vëmendshëm,nga fare pranë e përcjell atë në rrjetë. Goli i shpejtë u ka shërbyer miqve për të zotëruar situatën, madje dhe në raste të veçanta përpiqeshin me forma të ndryshme për ta vonuar lojën. Ky fakt nuk u përcoll mirë nga futbollistët dhe tifozët vendës. Në minutën e 30-të, Hajdari pati rastin më të pastër për ta barazuar rezultatin, por pa ia arritur qëllimit.Në 45 minutat e dyta, loja u kontrollua më mirë nga Sopoti, por kurbinasit e kujdesshëm arritën që t’i bënin të pavlefshme të gjitha sulmet. Librazhdasit nuk mundën të përfitonin, edhe kur ekipi mik mbeti me 10 lojtarë, pasi Xhetani u ndëshkua edhe me kartonin e dytë të verdhë. Në fund të takimit përsëri Hajdari pati rastin më të mirë për të barazuar, por portieri kurbinas nuk e lejoi.
A.Stefani