SHQIPERI 0-0 SUEDI

TIRANE - Kombëtarja shqiptare e ka nisur me një barazim 0-0 kundër Suedisë fushatën eleminatore në Botërorin 2010. Pas 90 minutash të mbushura me emocione, kuqezinjtë nuk e kanë prishur traditën e trajnerëve të huaj, duke shënuar një debutim të suksesshëm edhe të Ari Han. Përballë një skuadre të mbushur me yje dhe shtatlartë, trajneri kuqezi pati vendosur një formacion me 5 mesfushorë dhe me sulmues të vetëm Salihin. Rasti i parë do të vinte pas 16 minutash, kur Ibrahimoviç do të befasonte Beqajn me një goditje të bukur nga kufijtë e zonës, por që ndalet nga shtylla. Më pas është Majstoroviç ai që rrezikon me kokë, por këtë herë Beqaj është i vëmendshëm. Pas gjysmë ore lojë, është Hamdi Salihi ai që tenton të tregohet i rrezikshëm në zonë, pas një gjuajtje të Skelës. Pjesa e parë do të mbyllet kështu.E dyta nis me një rast të mirë për Shqipërinë, por Cana nuk arrin me kokë. Në të 53-tën është Jahmir Hyka, ai që çmend mbrojtësit suedezë nga e majta dhe kuqezinjtë janë sërish pranë golit. Talenti kuqezi më pas do të tentojë vetë nga kufijtë e zonës, por portieri suedez Isakson do të tregohet i saktë. Në të 75-tën ka provuar edhe Skela brenda zonës, por gardiani i Suedisë tregohet pozicional. Han më pas fut Berishën në vend të Salihit si edhe Telin në vend të Skelës, duke e kthyer skuadrën vetëm në mbrojtje. Deri në fund suedezët tentojnë me shumë topa në adresë të Ibrahimoviç, por pa arritur të vënë asnjëherë në provë Beqajn. Barazimi do të thotë një pikë për Shqipërinë në grupin 1 të Botërorit 2010. Të mërkurën, përfaqësuesja kuqezi do të presë Maltën, një ndeshje ku kërkohen patjetër tre pikët.